Plantun de Prouvènço

Pèr coumpara dos planto d'encò nostre

Helictotrichon sedenense & Cyperus esculentus

Helictotrichon sedenense

Poaceae Graminaceae

Nom en français : Avoine de Seyne.

Descripcioun :
Civado renadivo que trachis dins li tepiero roucaiouso e lis esboudèu de mountagno. Coume tóuti li Helictotrichon porto de costo que se vèson bèn sus lou dessubre di fueio. Lis espiguet (emé au mens dos flour qu'an uno arèsto) soun lusènt e un pau vióulet, li fueio soun plano e mai larjo que 1 mm (fotò). La lengueto èi courteto e cihado.

Usanço :
Es uno bono erbo pasturiero pèr lou fedan.

Port : Erbo
Taio : 30 à 70(90) cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Helictotrichon
Famiho : Poaceae
Famiho classico : Graminaceae

Ordre : Poales

Coulour de la flour : Vióuleto
Petalo : ges
Ø (o loungour) flour : Pancaro entresigna
Flourido : Printèms - Estiéu

Sòu : Ca
Autour basso e auto : 1700 à 2200 m
Aparado : Noun

Liò : Tepiero roucaiouso - Esboudèu - Mountagno mejano
Estànci : Mountagnard à Subaupen
Couroulougi : Ouroufito-Ouèst-Mediterranenco
Ref. sc. : Helictotrichon sedenense (Clarion ex DC.) Holub, 1970 (= Avena montana Vill., 1787 )

Triangle(-manjadis)

Cyperus esculentus

Cyperaceae

Nom en français : Souchet comestible.

Descripcioun :
Lou triangle-manjadis trachis dins li limas de ribiero o li culturo. Pèr l'ouro n'i'a pas gaire au nostre, soulamen un pau au couchant. Se recounèis à sis enflourejado jauno daurado e subretout à si cabosso o tubercule. Douno un pau d'èr à Cyperus rotundus que fai de cabosso negro. La varieta presentado eici, Leptostachyus, èi naturalisado (óurigino Americo de l'uba).

Usanço :
Coume lou dis soun noum es uno planto manjadisso. En Espagno s'adoubo emé lou tubercule l'horchata de chufa, valènt-à-dire l'ourjado de triangle. Se fai tambèn un òli de qualita, richo en vitamino E e bon pèr la pèu.